Meahciráđđehus almmustahtii ráfáidahttinkárttáid, vai meahccejohtalusas sáhttet vuhtiiváldit rašes luonddu buorebut
2025-03-12Meahciráđđehus lea almmustahttán golmma davimus gieldda guvlui kárttáid eaktodáhtolaš ráfáidahttinguovlluin, gos ávžžuhit garvit johtimis mohtorfievrruiguin.
Geahpedan dihtii hehttehusaid lundui, Meahciráđđehus lea almmustahttán eräluvat.fi-neahttasiidduinis Eanodagas, Anáris ja Ohcejogas eaktodáhtolaš ráfáidahttinguovlokárttáid. Kárttáide merkejuvvon guovlluin ávžžuhit garvit johtimis mohtorfievrruiguin ja ovdamearkka dihtii ráfáidahttin dihtii bohccuid guottetáiggi. Oassi kártái merkejuvvon guovlluin leat suodjalanguovllut, muhto stuorámus oassi leat stáhta máŋgga anu vuovddit dahje meahcceguovllut.
“Gažaldagas lea gulahallanvuohki, man mii sávvat lasihit guovllus johtti olbmuid diđolašvuođa guovllu luonddu- ja luondduealáhusárvvuin. Stuorámus oassi báikegoddelaččain ja guovllu eará geavaheaddjiin máhttet johtit guovlluin áššálaččat, muhto lea dihtton maiddái heađušteaddji vuodjin, man dihtii háliidivččiimet buktit dáid erenomáš rašes guovlluid ovdan, muitala bálvalusoamasteaddji Elina Odé Meahciráđđehus Luonddubálvalusain.
Bilket beassá ja luottain oažžu johtit, vaikke dat manašedje ráfáidahttinguovlluid čađa
Meahciráđđehus mieđiha Eanodaga, Anára dahje Ohcejoga gielddaid fásta ássiide báikegoddelačča meahccejohtolatlobi dan áigodahkii go eatnamis lea muohta. Lohpi diktá lohpeeavttuid mielde johtit vealtameahttun sivaid vuođul ja luondduávkkástallanbargguid dihtii stáhta eatnamiin. Álbmot- ja luonddumehciin lobi vuođul ii oaččo johtit.
Vealtameahttun johtin lohpeeavttuid mielde lea ovdamearkka dihtii ruovttu ja bargosaji gaskkas johtin, gávppis fitnan dahje giddodahkii johtin. Lohpi diktá maid johtit dahje fievrredit priváhtta olbmuid dahje dárbašiid tuvra- dahje bilkenčuozáhagaide. Hehttekeahtes johtin lohpeeavttuid mielde dál almmustahttojuvvon ráfáidahttinguovlluin lea ain lobálaš dahjege gielkkáin beassá ovdamearkka dihtii bilket.
Meahciráđđehus sávvá dál vuđolaš vihkkedallama, jus pláne vuodjit eaktodáhtolaš ráfáidahttinguovlluin. Jus guovllus johtá, galggašii álgovurrosaččat geavahit stáđásmuvvan geainnuid ja sihkkarastit, ahte ođđa luottat eai šatta.
“Kártái merkejuvvon ráfáidahttinguovlluin luondu lea erenomáš rašši hehttehusaid hárrái, nappo lea suokkardallan veara, leago alddis vealtameahttun johtit doppe,” čoahkkáigeassá Odé.
Maiddái luoddalobi oastán olbmot ožžot ain vuodjit kárttáide ja meahccái merkejuvvon Meahciráđđehusa lohpeluottain, vaikke dat manašedjege ráfáidahttinguovlluid čađa. Meahciráđđehus sávvá, ahte maiddái luoddalobi oastán olbmot giddejit erenomáš fuomášumi dasa, ahte sii bissot merkejuvvon luottaid alde maiddái čáhceguovlluin. Berre leat dárkil eandalii dalle, go luottat mannet eaktodáhtolaš ráfáidahttinguovlluid čađa.
Ovdal go vuolgá mátkái, gánnáha dárkkistit mohtorgielkáluotta rabasáiggiid Meahciráđđehusa eräluvat.fi-neahttasiidduin.